ਸਰੀ, 21 ਅਪ੍ਰੈਲ (ਵਿਸ਼ੇਸ਼ ਪ੍ਰਤੀਨਿਧ) : ਸਰੀ ਦੇ ਵਿਸਾਖੀ ਨਗਰ ਕੀਰਤਨ ਵਿਚ ਪੰਜ ਲੱਖ ਤੋਂ ਵੱਧ ਸ਼ਰਧਾਲੂਆਂ ਨੇ ਹਾਜ਼ਰੀ ਲਵਾਉਂਦਿਆਂ ਨਵਾਂ ਰਿਕਾਰਡ ਕਾਇਮ ਕਰ ਦਿਤਾ। ਖ਼ਾਲਸਾ ਸਾਜਨਾ ਦਿਹਾੜੇ ਦੇ ਸਬੰਧ ਵਿਚ ਸਜਾਏ ਅਲੌਕਿਕ ਨਗਰ ਕੀਰਤਨ ਦੌਰਾਨ ਕੈਨੇਡਾ ਅਤੇ ਅਮਰੀਕਾ ਸਣੇ ਦੁਨੀਆਂ ਦੇ ਕੋਨੇ-ਕੋਨੇ ਤੋਂ ਸੰਗਤ ਪੁੱਜੀ ਹੋਈ ਸੀ। ਸਰੀ ਦੀਆਂ ਗਲੀਆਂ ਵਿਚ ਹਰ ਪਾਸੇ ਸੰਗਤਾਂ ਦਾ ਠਾਠਾਂ ਮਾਰਦਾ ਇਕੱਠ ਨਜ਼ਰ ਆ ਰਿਹਾ ਸੀ ਅਤੇ ਦਰਜਨਾਂ ਵੰਨ-ਸੁਵੰਨੇ ਫਲੋਟ, ਨਗਰ ਕੀਰਤਨ ਦੀ ਸ਼ੋਭਾ ਵਧਾ ਰਹੇ ਸਨ। ਪੰਜ ਪਿਆਰਿਆਂ ਦੀ ਅਗਵਾਈ ਹੇਠ ਰਵਾਨਾ ਹੋਏ ਨਗਰ ਕੀਰਤਨ ਵਿਚ ਸੰਗਤ ਗੁਰਬਾਣੀ ਕੀਰਤਨ ਕਰਦੀ ਹੋਈ ਅੱਗੇ ਵਧ ਰਹੀ ਸੀ ਜਦਕਿ ਬੱਚੇ ਅਤੇ ਨੌਜਵਾਨ ਗਤਕੇ ਦੇ ਜੌਹਰ ਵਿਖਾ ਰਹੇ ਸਨ। ਸੰਗਤ ਦੀ ਸੇਵਾ ਲਈ ਹਰ ਪਾਸੇ ਲੰਗਰ ਵੀ ਲੱਗੇ ਹੋਏ ਸਨ।

ਬਰੈਂਪਟਨ, 19 ਅਪ੍ਰੈਲ (ਵਿਸ਼ੇਸ਼ ਪ੍ਰਤੀਨਿਧ) : ਬਰੈਂਪਟਨ ਦੇ 73 ਸਾਲਾ ਬਜ਼ੁਰਗ ਤਰਸੇਮ ਲਾਲ ਬਾਂਗੜ ਬੁੱਧਵਾਰ ਤੋਂ ਲਾਪਤਾ ਹਨ ਅਤੇ ਪੁਲਿਸ ਨੇ ਉਨ•ਾਂ ਦੀ ਭਾਲ ਲਈ ਲੋਕਾਂ ਦੀ ਮਦਦ ਮੰਗੀ ਹੈ। ਪੀਲ ਰੀਜਨਲ ਪੁਲਿਸ ਨੇ ਦੱਸਿਆ ਕਿ ਤਰਸੇਮ ਲਾਲ ਬਾਂਗੜ ਨੂੰ ਆਖ਼ਰੀ ਵਾਰ ਕੌਨੈਸਟੋਗਾ ਡਰਾਈਵ ਅਤੇ ਬੋਵੇਅਰਡ ਡਰਾਈਵ ਇਲਾਕੇ ਵਿਚ ਵੇਖਿਆ ਗਿਆ। ਤਰਸੇਮ ਲਾਲ ਦਾ ਸਰੀਰ ਦਰਮਿਆਨਾ ਅਤੇ ਵਾਲ ਸਫ਼ੈਦ ਹਨ। ਉਹ ਨਜ਼ਰ ਵਾਲੀ ਐਨਕ ਪਹਿਨਦੇ ਹਨ ਅਤੇ ਆਖ਼ਰੀ ਵਾਰ ਵੇਖੇ ਜਾਣ ਵੇਲੇ ਉਨ•ਾਂ ਨੇ ਗ੍ਰੇਅ ਅਤੇ ਬਲੈਕ ਜੈਕਟ, ਗ੍ਰੇਅ ਪੈਂਟ ਅਤੇ ਭੂਰੇ ਰੰਗ ਦੀ ਜੁੱਤੀ ਪਾਈ ਹੋਈ ਸੀ। ਪੁਲਿਸ ਨੇ ਕਿਹਾ ਕਿ ਤਰਸੇਮ ਲਾਲ ਦਾ ਪਰਵਾਰ ਉਨ•ਾਂ ਦੀ ਸੁੱਖ-ਸਾਂਦ ਪ੍ਰਤੀ ਬੇਹੱਦ ਚਿੰਤਤ ਹੈ ਅਤੇ ਜੇ ਕਿਸੇ ਕੋਲ ਉਨ•ਾਂ ਬਾਰੇ ਕੋਈ ਜਾਣਕਾਰੀ ਹੈ ਤਾਂ ਤੁਰਤ 22 ਡਵੀਜ਼ਨ ਦੇ ਅਫ਼ਸਰਾਂ ਨਾਲ 905-453-2121 ਐਕਸਟੈਨਸ਼ਨ 2233 'ਤੇ ਕਾਲ ਕੀਤੀ ਜਾਵੇ।

ਬਰੈਂਪਟਨ, 19 ਅਪ੍ਰੈਲ (ਵਿਸ਼ੇਸ਼ ਪ੍ਰਤੀਨਿਧ) : ਪੀਲ ਰੀਜਨ ਵਿਚ ਬਗ਼ੈਰ ਸੀਟ ਬੈਲਟ ਤੋਂ ਗੱਡੀ ਚਲਾਉਣ ਵਾਲਿਆਂ ਨੂੰ ਕਾਬੂ ਕਰਨ ਲਈ ਪੁਲਿਸ ਵੱਲੋਂ 18 ਅਪ੍ਰੈਲ ਤੋਂ 26 ਅਪ੍ਰੈਲ ਤੱਕ ਵਿਸ਼ੇਸ਼ ਮੁਹਿੰਮ ਚਲਾਈ ਗਈ ਹੈ ਜਿਸ ਦੌਰਾਨ ਫੜੇ ਗਏ ਡਰਾਈਵਰ ਨੂੰ ਇਕ ਹਜ਼ਾਰ ਡਾਲਰ ਤੱਕ ਜੁਰਮਾਨਾ ਕੀਤਾ ਜਾ ਸਕਦਾ ਹੈ। ਸੜਕ ਸੁਰੱਖਿਆ ਯਕੀਨੀ ਬਣਾਉਣ ਅਤੇ ਲੋਕਾਂ ਵਿਚ ਜਾਗਰੂਕਤਾ ਪੈਦਾ ਕਰਨ ਦੇ ਮਕਸਦ ਨਾਲ ਪੀਲ ਰੀਜਨਲ ਪੁਲਿਸ ਦੀਆਂ ਸਾਰੀਆਂ ਡਵੀਜ਼ਾਂ ਦੇ ਅਫ਼ਸਰ ਮੁਹਿੰਮ ਵਿਚ ਸ਼ਾਮਲ ਹੋ ਰਹੇ ਹਨ। ਉਨਟਾਰੀਓ ਪ੍ਰੋਵਿਨਸ਼ੀਅਲ ਪੁਲਿਸ ਦੇ ਅੰਕੜਿਆਂ ਮੁਤਾਬਕ ਪਿਛਲੇ 10 ਸਾਲ ਦੌਰਾਨ ਸੜਕ ਹਾਦਸਿਆਂ ਵਿਚ ਮਰਨ ਵਾਲੇ ਲੋਕਾਂ ਵਿਚੋਂ 24 ਫ਼ੀ ਸਦੀ ਨੇ ਸੀਟ ਬੈਲਟ ਨਹੀਂ ਪਹਿਨੀ ਹੋਈ ਸੀ।

ਟੋਰਾਂਟੋ, 18 ਅਪ੍ਰੈਲ (ਵਿਸ਼ੇਸ਼ ਪ੍ਰਤੀਨਿਧ) : ਕੈਨੇਡਾ ਵਿਚ ਭੰਗ ਦੀ ਵਿਕਰੀ ਤੋਂ ਹੋ ਰਹੀ ਆਮਦਨ ਵਿਚ ਹਿੱਸੇਦਾਰੀ ਲਈ ਕਾਟੋ-ਕਲੇਸ਼ ਛਿੜ ਗਿਆ ਹੈ ਅਤੇ ਮਿਊਂਸਪੈਲਟੀਜ਼ ਨੇ ਸੂਬਾ ਸਰਕਾਰਾਂ 'ਤੇ ਨਾਢੂ ਖ਼ਾਂ ਵਾਲਾ ਰਵੱਈਆ ਅਪਨਾਉਣ ਦਾ ਦੋਸ਼ ਲਾਇਆ ਹੈ। ਭੰਗ ਨੂੰ ਕਾਨੂੰਨੀ ਮਾਨਤਾ ਤੋਂ ਛੇ ਮਹੀਨੇ ਬਾਅਦ ਕੈਨੇਡੀਅਨ ਸ਼ਹਿਰ ਇਸ ਦੇ ਸਿੱਟੇ ਤਾਂ ਭੁਗਤ ਰਹੇ ਹਨ ਪਰ ਇਨ•ਾਂ ਦੇ ਇਵਜ਼ ਵਿਚ ਬਣਦੀ ਰਕਮ ਨਹੀਂ ਮਿਲ ਰਹੀ। ਨਿਯਮ ਕਹਿੰਦੇ ਹਨ ਕਿ ਭੰਗ ਦੀ ਵਿਕਰੀ ਤੋਂ ਹੋਣ ਵਾਲੀ ਆਮਦਨ ਵਿਚੋਂ ਸ਼ਹਿਰਾਂ ਨੂੰ ਹਿੱਸੇਦਾਰੀ ਦਿਤੀ ਜਾਵੇ ਤਾਂ ਕਿ ਉਹ ਪੁਲਿਸਿੰਗ ਅਤੇ ਹੋਰਨਾਂ ਕਾਰਜਾਂ 'ਤੇ ਹੋਣ ਵਾਲੇ ਵਾਧੂ ਖ਼ਰਚੇ ਨਾਲ ਨਜਿੱਠ ਸਕਣ। ਕੈਨੇਡਾ ਦੇ ਕਈ ਵੱਡੇ ਸ਼ਹਿਰਾਂ ਦੇ ਮੇਅਰਾਂ ਨੇ ਦੋਸ਼ ਲਾਇਆ ਹੈ ਕਿ ਸੂਬਾ ਸਰਕਾਰਾਂ ਆਮਦਨ 'ਤੇ ਕਬਜ਼ਾ ਕਰੀ ਬੈਠੀਆਂ ਹਨ ਅਤੇ ਫ਼ੈਡਰਲ ਸਰਕਾਰ ਨੂੰ ਇਸ ਮਾਮਲੇ ਵਿਚ ਦਖ਼ਲ ਦੇਣਾ ਚਾਹੀਦਾ ਹੈ।

ਵੈਨਕੂਵਰ, 18 ਅਪ੍ਰੈਲ (ਵਿਸ਼ੇਸ਼ ਪ੍ਰਤੀਨਿਧ) : ਸਿੱਖ ਧਰਮ ਦੇ ਸਿਧਾਂਤਾਂ ਅਤੇ ਸਿੱਖਿਆਵਾਂ ਤੋਂ ਹਾਂਗ-ਕਾਂਗ ਦਾ ਪੈਟ ਚੁੰਗ ਐਨਾ ਪ੍ਰਭਾਵਤ ਹੋਇਆ ਕਿ ਪੈਟ ਸਿੰਘ ਬਣ ਗਿਆ ਅਤੇ ਹੁਣ ਪੂਰਨ ਸਿੱਖ ਸਰੂਪ ਵਿਚ ਦੁਨੀਆਂ ਨੂੰ ਗੁਰੂ ਸਾਹਿਬਾਨ ਵੱਲੋਂ ਦਿਖਾਇਆ ਰਾਹ ਅਪਨਾਉਣ ਲਈ ਪ੍ਰੇਰਿਤ ਕਰ ਰਿਹਾ ਹੈ। ਪੈਟ ਸਿੰਘ ਚੀਨੀ ਮੂਲ ਦੇ ਗਿਣੇ-ਚੁਣੇ ਸਿੱਖਾਂ ਵਿਚੋਂ ਹੈ ਜਿਸ ਨੂੰ ਕੁਝ ਸਾਲ ਪਹਿਲਾਂ ਤੱਕ ਸਿੱਖ ਧਰਮ ਬਾਰੇ ਜ਼ਿਆਦਾ ਜਾਣਕਾਰੀ ਨਹੀਂ ਸੀ। ਇਕ ਦਿਨ ਪੈਟ ਸਿੰਘ ਨੇ ਵੈਨਕੂਵਰ ਦੇ ਕਾਰਨੇਗੀ ਕਮਿਊਨਿਟੀ ਸੈਂਟਰ ਦੇ ਬਾਹਰ ਲੋਕਾਂ ਦੀ ਭੀੜ ਵੇਖੀ ਅਤੇ ਮਨ ਵਿਚ ਉਠ ਰਹੇ ਸਵਾਲਾਂ ਨੂੰ ਸ਼ਾਂਤ ਕਰਨ ਲਈ ਉਹ ਭੀੜ ਦੇ ਨੇੜੇ ਪੁੱਜ ਗਿਆ। ਪੈਟ ਸਿੰਘ ਨੇ ਵੇਖਿਆ ਕਿ ਲੋਕਾਂ ਨੂੰ ਮੁਫ਼ਤ ਖਾਣਾ ਵੰਡਿਆ ਜਾ ਰਿਹਾ ਸੀ ਅਤੇ ਇਹ ਸਰਕਾਰ ਵੱਲੋਂ ਨਹੀਂ ਸਗੋਂ ਸਿੱਖ ਭਾਈਚਾਰੇ ਦੇ ਲੋਕ ਵੰਡ ਰਹੇ ਸਨ।